काठमान्डौं । कोरोनाको दोस्रो लहर सुरु भएसँगै कमेडी च्याम्पियन सिजन (२) को प्रसारण बन्द भयो । कोरोनाको समयमा दर्शकलाई हँसाएर बस्न नसकिने भन्दै निर्माणपक्षले प्रतियोगितालाई अनिश्चितकालका लागि बन्द गरेको थियो ।
बन्द भएको झण्डै सात हप्तापछि कमेडी च्याम्पियन पुनस् प्रसारणमा आउने भएको छ । भोलि शुक्रबारदेखि कमेडी च्याम्पियनको प्रसारण सुरु गर्न लागिएको निर्देशक विशाल भण्डारीले जानकारी दिए ।
कमेडी च्याम्पियन पुनस् प्रसारण हुन लागेको भन्दै निर्माणपक्षले युट्युबमा एक ट्रेलर सार्वजनिक गरेको थियो । जुन अहिले नेपाली युट्युबको ट्रेण्डिङमै परेको छ । उक्त ट्रेलरमा धेरैले प्रतीक्षारत रहेको उल्लेख गरेका छन् ।
निर्देशक भण्डारी ट्रेलरमा आएका प्रतिक्रियाबाट उत्साहित छन् । उनी भन्छन्, “केही समय ब्रेक हुँदा पनि हामीलाई दर्शकले प्रतीक्षा गरिरहनुभएको रहेछ । दर्शकले हामीलाई देखाउनुभएको मायाले हामी उत्साहित भएका छौँ ।”
निर्माणपक्षले उच्च सतर्कता अपनाएर गत आइतबार नै उत्कृष्ट नौ प्रतियोगीहरूको प्रस्तुति खिचिसकेको छ । जसमा नेपाली फिल्मक्षेत्रमा दुई अभिनेत्रीहरू ुसेलिब्रेटी जजुको रूपमा उपस्थित भएका छन् । निर्माणपक्षले अभिनेत्री करिश्मा मानन्धर र अभिनेत्री रेखा थापालाई अतिथि बनाएको छ ।
कमेडी च्याम्पियनको जजमा पहिलो सिजनका जज सन्तोष पन्त, मनोज गजुरेल, प्रदीप भट्टराई, ऋचा शर्मा नै दोहोरिएका छन् । ‘कमेडी च्याम्पियन’ मा केकी अधिकारी, रीमा विश्वकर्मा, विशाल भण्डारी, राज घिमिरेको लगानी रहेको छ ।
