काठमाडौं । माओवादी केन्द्रका अध्यक्ष पुष्पकमल दाहाल ‘प्रचण्ड’ आफ्नो निर्वाचन क्षेत्र चितवनको माडी पुगेका छन् ।
मंगलबार चितवन पुगेका पूर्वप्रधानमन्त्री प्रचण्डले बुधवार साँझ आफ्नो निर्वाचन क्षेत्रको भ्रमण गरेका हुन् ।
उनले माडीस्थित गठबन्धन दलका प्रतिनिधिहरूसँग समसामयिक राजनीतिक अवस्थाको विषयमा छलफल गरेका थिए ।
उनले गठबन्धन दलका सहयात्रीहरूले खेल्नुपर्ने भूमिका र समग्र माडीको विकासका बारेमा पनि चासो व्यक्त गरेका उनको निजी स्रोतले बतायो ।
उनी माडीको प्रमुख पर्यटकीयस्थल सोमेश्वर गढीमा मर्निङ वाकमा पुगेका थिए। 
करिब एक किमि पैदल हिँडेर प्रचण्ड सोमेश्वर पुगेका हुन् । सो अवसरमा अध्यक्ष प्रचण्डले गढीमा कुदिएका ५३ वटा कलात्मक विशाल मूर्तिहरूको अवलोकन पनि गरे ।
सोमेश्वर गढी भ्रमण वर्षका लागि छनौट भएका एक सय गन्तव्य मध्येको एक हो ।
माडीका मेयर ठाकुरप्रसाद ढकाल, भरतपुर महानगरका मेयर रेनु दाहाल, स्वकीय सचिव गंगा दाहाल, प्रमुख जिल्ला अधिकारी अस्मान तामाङ, चितवन प्रहरी प्रमुख ओमप्रसाद अधिकारी सहितको टोली सोमेश्वर गढी पुगेका थिए ।
मेयर ढकालले सोमेश्वर गढीमा सिँढी निर्माण र भ्युटावर निर्माण गर्न पूर्वप्रधानमन्त्री प्रचण्डले प्रतिवद्धता जनाएको बताए ।
सोमेश्वर गढीमा २०७७ मा ढुंगामा मूर्ति कुदिएको थियो । सोमेश्वर गढी नेपाल–भारत सीमा स्तम्भ समेत छ ।
