काठमान्डौं : बुधबार साँझ मेरियट होटलमा एमाले वरिष्ठ नेता माधवकुमार नेपालसँगको भेटमा प्रधानमन्त्री तथा एमाले अध्यक्ष केपी शर्मा ओलीले फ्याट्ट भन्नुभएको विषयलाई लहरो तान्दा पहरो गर्जेको रुपमा लिइएको छ ।
पार्टी एकताबद्ध हुनुपर्छ भन्ने मान्यतामा भएको भेटमा प्रधानमन्त्रीले ‘तपाईं र हामी मिल्दा नै पनि संख्या पुग्ने होइन’ भन्दै पहिले नै कुरोबाट छेकारो काट्नुभएको थियो ।
सरकार बनाउने बहुमतको लागि संसदमा १ सय ३८ सांसद चाहिन्छ । तर सर्वोच्चको फैसलापछि अहिले एमालेसँग १ सय २१ सिट मात्र कायम रहेको छ । न्यूनतम बहुमतको लागि थप १७ सिटको आवश्यकता पर्छ । त्यसको लागि अहिले प्रधानमन्त्रीलाई भ्यागुताको धार्नी भएको छ ।
बालुवाटार निकटस्थ स्रोत भन्छ,‘प्रधानमन्त्री बरु भाँच्चिनुहुन्छ तर झुक्नुहुन्न ।’
अर्कोतर्फ बैशाखको चौथो सातासम्म सरकारले आगामी आर्थिक वर्षको नीति तथा कार्यक्रम ल्याउनैपर्छ । लगत्तै जेठ १५ मा बजेट ल्याउनुपर्ने संवैधानिक व्यवस्था छ । माओवादी केन्द्रले औपचारिक रुपमा अविश्वास घोषणा नगरेपनि यो सरकारको खास संख्या भनेको १ सय २१ हो ।
अब नेता नेपालपक्षीय २७ जना सांसदहरुलाई एकै घानमा सिध्याउने हो भने त्यो संख्या ९४ मा झर्नेछ । कथम् १ सय २१ कायम रहेर जसपाभित्रको पूर्व राजपाका १६ जना सांसदको मत खन्याउँदा पनि सरकारलाई बहुमत पुग्दैन ।
यस्तो अवस्थामा सरकारले कुनै पहल नगर्ने हो भने नीति तथा कार्यक्रम स्वतः फेल हुनेछ । हुन त नीति तथा कार्यक्रम फेल भएपछि प्रधानमन्त्रीको दाउ फेरि संसद विघटन गर्ने नै हो । बालुवाटार निकटस्थ स्रोत भन्छ,‘प्रधानमन्त्री बरु भाँच्चिनुहुन्छ तर झुक्नुहुन्न ।’
राजनीतिक विश्लेषकहरुका अनुसार सरकारको नीति तथा कार्यक्रम फेल भए पनि प्रधानमन्त्रीले राजिनामा दिनुहुने छैन । बरु उहाँले भन्नुहुनेछ ‘पुनर्स्थापित संसदको अधिवेशन सकियो तर,वैकल्पिक सरकार बनेन । अब पनि वैकल्पिक सरकार बन्दैन ।
त्यसकारण मैले संसद विघटन गरेको ठीक छ भनेर विघटनलाई पुनः पुष्टि गर्न अहिले नयाँ फण्डा फालिएको हुनसक्छ । अस्ति र हिजोको भेटघाट पनि त्यहि हो ।’
प्रधानमन्त्रीले अरुलाई आफ्नो योजनाबाट विमुख बनाउन विभिन्न भेटघाटसमेत गर्ने गर्नुभएको छ । यसअघि पुस ४ को बेलुका पनि प्रधानमन्त्रीले भैंसेपाटी पुगेर एमाले उपाध्यक्ष वामदेव गौतमलाई भेट्नुभएको थियो । भोलिपल्ट बिहान प्रतिनिधि सभा विघटन हुँदा जिल्ल पर्ने पालो वामदेवकै रह्यो ।
त्यसरी अघिल्लो साँझ भेट्नुको उद्देश्य आफू पार्टी एकताको लागि एकदम लचिलो रहेको सन्देश दिँदै अन्तिम प्रयास गरेको देखाउनु नै थियो । त्यसो गर्दा अर्का अध्यक्ष पुष्पकमल दाहाल प्रचण्डका गतिविधि अलि बढी नै रहेको पुष्टि गर्न सजिलो हुने निश्कर्ष हो ।
अहिले पनि नेपालसँग भेट्नुको उद्देश्य अन्तिमसम्म पहल गरेको थिएँ भनेर पार्टी कार्यकर्ता र जनमानसलाई विश्वस्त पार्नु रहेको बताइन्छ । यो हदसम्म गर्दा पनि नेपालले मान्नुभएन,पार्टी एकताको लागि उहाँ तयार रहनुभएन भन्ने देखाउनको लागि बुधबार र बिहिबार भेट गरिएको आशंका गर्नेहरुको कमि छैन ।
