काठमाडौं । प्रधानमन्त्री शेरबहादुर देउवा नेतृत्वको सरकारले पूर्णता पाउने भएको छ । सरकार बनेको करिब तीन महिनापश्चात् देउवा नेतृत्वको सरकाले पूर्णता पाउने भएको हो ।
सबै विषयमा सहमति जुटे आजै मन्त्रिमण्डल विस्तार हुने सरकारका प्रवक्ता एवं कानुनमन्त्री ज्ञानेन्द्रबहादुर कार्कीले बताए ।
उनका अनुसार आज बिहान बसेको सत्ता गठबन्धनका शीर्ष नेताको बैठकले मन्त्रिमन्डलको भागबन्डा टुंगोमा पुर्याएको हो । कसले कति र कुन–कुन मन्त्रालय पाउँदै छन् भन्ने बाह्रखरीको प्रश्नमा मन्त्री कार्कीले सबै कुरा शपथग्रहणपछि मात्र बाहिर आउने बताए । “बिहान बसेको बैठकले भागबन्डा टुंग्याएको छ, अब चाँडै मन्त्रिमन्डल विस्तार हुन्छ,” उनले भने ।
मन्त्री कार्कीले सरकार विस्तारमा प्रधानन्यायाधीशको भूमिका सम्बन्धमा बाहिर भइरहेको चर्चा बारेमा कुनै सत्यता नभएको जिकिर गरे । “प्रधानन्यायाधीशको बारेमा बाहिर भएको चर्चामा कुनै सत्यता छैन,” उनले भने, “सरकारमा प्रधानन्यायाधीशले भाग मागेको कुरा बेकार हो ।”
